“World IP Day” dela eta, Jabetza Industrial eta Intelektualaren (IParen) Munduko Eguna, GALBAIANek jardunaldi bat antolatu zuen Zorrotzaurreko Bilbao AS Fabrik auditorioan. WIPO erakundeak (“World Intellectual Property Office” delakoak) aurtengo “World IP Day” ospatzeko aukeratu zuen gaia IPa eta kirola izan zen. Nolanahi ere, kirola ekitaldi osoan presente egon bazen ere, jardunaldiarentzako aukeratutako izenburua hau izan zen: “Asmatzaileak: adimena bereizkuntzaren zerbitzura”. Gaiak joko handia eman zuen eta bikain garatu zuten hizlari gisa parte hartu zuten hiru gonbidatuek.
Ismael Igartua gure zuzendariak sarreran azpimarratu zuen bezala, aurtengo jardunaldia berezia izan zen GALBAIANentzat hainbat arrazoirengatik. Lehenik eta behin, aurten hamargarren GALBAHE Saria ematea tokatzen zen, eta, hori ospatzeko, aurreko urteetan saria jaso zuten pertsonak gonbidatu genituen eta hiru hizlari gonbidatuen aurkezpenen ondoreneko mahai-inguruan hartu zuten parte. Gainera, gure irudi berria eta lelo berria partekatu genituen bertaratutakoekin: “Your IP Partners”.
Gainera, Ismael Igartuak iragarri zuen bulego berria ireki dugula, Bilbao As Fabriken bertan hain zuzen ere. Azaldu zuen zentzu handia duela GALBAIAN Zorrotzaurren egoteak, Bilboko abangoardia teknologikoaren ikurra baita, eta, Juan Mari Aburto hiriko alkatearen hitzetan, Bilbo berria izango denaren aitzindaria. Gure zuzendariak Jorge Santiago lankideari eman zion hitza, bulego berri honen arduradunari, eta honek IPari eta kirolari buruzko hitzaldi bat eman zuen, hiru gonbidatuen enpresen patenteei eta diseinu industrialei keinu eginez.
Ondoren, gure lankide Amaia Sarasolak hizlari gonbidatuak aurkeztu zituen. Lehenik eta behin, Jesús Latak hartu zuen parte, SENERen Chief Technical Engineer denak. Ondoren, Beñat Auzmendi ORBEAko berrikuntza arduradunak jarraitu zion, eta Fernando Burguera BATZeko ingeniaritza aurreratuko arduradunak eman zien amaiera aurkezpenei.
Hiru hitzaldi inspiratzaile izan ziren, eta ideia oso indartsuak partekatu zituzten. Segidan entzuleekin partekatu zituzten gogoeta batzuk erreproduzitzen ditugu.
Jesús Lata, Chief Technical Engineer SENERen
“Asmatzaileak konplexutasunetik ihes egin behar du, konponbideak sinpleak izan behar dira, aspektu guztien kuestionamendu kritiko handiko prozesu baten ondoren eta aldaketen beldurrik gabe.”
“Xede batekin berritu behar da.”
Beñat Auzmendi, Head of Innovation Engineering ORBEAn
“ORBEAn asmatzaile garenok bizikletaren benetako zaleak gara, eta guk eduki nahiko genituzkeen irtenbideak bilatzen ditugu”.
“Funtsezkoa da patenteen eta IParen arloko arriskua kudeatzen jakitea”
Fernando Burguera, Advanced Engineering Manager BATZen
“Berrikuntza maila merkatuak eskatzen duenera egokitu behar da. “Eureka efektutik” ihes egin behar da, zerbait iraultzailea aurkeztuz, bezeroak eskatzen duena ez bada. Bezeroak paradigma aldatzen duenean, orduan bai, orduan badago zerbait iraultzailea egiteko aukera”.
Lehen aipatutako hiru hitzaldien ondoren eta aurtengo saria banatu aurretik, aurreko urteetako saridunek eta hiru hizlariek mahai-inguru animatu batean parte hartu zuten, eta jardunaldiari izenburua ematen zion gaiari buruz hausnartu zuten. Aurreko urteetan sarituen artean mahai-inguruan parte hartu zutenak Nagore Abrisketa, Vicinay Marine Innovación enpresako proiektuen arduraduna, Bitor Mendiguren, Ingeteameko sortzailea, Arrate Jaureguibeitia, garai hartan Biolaneko berrikuntza zuzendaria eta gaur egun BAICeko estrategia zuzendaria, Manu Colino, Ulma Constructioneko I+G ingeniaritzako teknikaria, Tomas Morlanes, Fagor Automationeko Arlo Optikoko arduradun teknologikoa eta Eneko Izquierdo, Ulma Packagingeko Adimen Lehiakorreko arduraduna izan ziren. Adimen artifizialak haragizko asmatzaileak ordezka ote zitzakeen planteatu zen, eta horrek interes handia piztu zuen eztabaida bat eragin zuen.
Azkenik, Jesús Latak GALBAHE Saria jaso zuen, aurreko urteetan sarituek, gainerako hizlariek eta bertaratutakoek inguratuta.
Ondoren, koktel bat egin zen, eta bertaratutakoek jardunaldiaz gozatzen jarraitu zuten.
